کۆچی دوایی پێشمەرگەیەکی دێرینی حیزبی دێموکرات

بە داخێکی گرانەوە سەر لە بەیانی ئەمڕۆ چوارشەممە رێکەوتی ٢٤/٠٧/٢٠١٩، هاوڕێ و تێکۆشەری دێرینی حدکا سەلیم دەورێشی ناسراو بە ” سەلیمە رەش ” خەڵکی شارۆچکەی نەڵۆسی شنۆ كە دانیشتووی شاری لینشۆپینگی وڵاتی سوئێدە لە کاتی وەرزشکردن دڵی لە لێدان دەکەوێت .

کاک سەلیم لە دایکبووی ساڵی ١٣٤٤ ی هەتاوی (١٩٦٥ـی زایینی) لە نەڵۆسی سەر بە شاری شنۆ بوو. هەر لە سەرەتای خەباتی حیزبی دیمۆكراتدا دەبێتە ئەندامی یەکێتیی لاوانی دێموکرات و تێکەڵ بە کاری سیاسی دەبێ.

هاوڕێ سەلیم کەسێکی روح سووک و لەبەر دڵان بوو.لە مانگی گەلاوێژی ساڵی ١٣٦٥ هەتاوی دەبێتە پێشمەرگەی حیزبی دێموکراتی کوردستانی ئێران و لە بەشە جۆرەجۆرەکانی هێزی کێلەشین ئەرکی حیزبی بەو پەڕی دڵپاکی و لە خۆبردوویییەوە بەجێ دەگەیاند.

لە ساڵی ١٩٩٥ واز لە پێشمەرگایەتی دێنیت و وەک ئەندامی حیزب درێژە بە کارەکانی دەدات و پاشان لە ساڵی ١٩٩٨ لە وڵاتی سوئێد دەگیرسێتەوە و دیسان وەک کەسێکی نیشتیمانپەروەر، ئەرکەکانی حیزبی بەجێ دەگەیاند تا کاتی ماڵئاوایی.

بە داخەوە بەهۆی وەستانی دڵەوە لە کاتی وەرزشکردندا ماڵئاوایی یەکجاری لێکردین .

روحی شاد بێ

حیزبی دێموکراتی کوردستانی ئێران –کۆمیتەی سوئێد

٢٤/٠٧/٢٠١٩