لە سمینارێكی تەشكیلاتیدا كۆمیتەی ڤێسترۆس نۆژەنكرایەوە

بەبەشداریی زۆرینەی ئەندامانی حیزبی دیمۆكراتی كوردستانی ئێران لە شاری ڤێسترۆس و چاودێریی راستەوخۆی سەرجەم ئەندامانی كۆمیتەی گشتیی حیزب لە سوئێد، رۆژی شەممە 2019.07.20 سمینارێكی تەشكیلاتی بەڕێوەچوو كە تێیدا كۆمیتەی تازەی حیزب لەو شارە دەست بەكار بوو.

سەرەتای سمینار بە سروودی “ئەی رەقیب” و رێزگرتن لە شەهیدانی گەل و نیشتمان دەستی پێكرد و لەسەر دەستی كۆمیتەی ڤێسترۆس بەخێرهاتنی ئەندامان و بەشدارانی سمینار كرا كە تێیدا راپۆرتی كاری كۆمیتە خرایە بەرباس و گفتوگۆ و هەڵسەنگاندنی هەمەلایەنەی بۆ كرا.

دواتر مەولوود عەبدیلزادە، بەرپرسی كۆمیتەی گشتیی حیزب لە سوئێد وێڕای سپاسی حیزب بۆ بەشداریی “راسانی تاراوگە” لە یادی 30 ساڵەی شەهیدانی ڤیەن كە لە بروكسل بەڕێوەچوو، راپۆرتی خۆی لە كاروباری كۆمیتە بەتایبەت لە بواری تەشكیلاتی و چۆنیەتیی بڕیار و كاری حیزب پێشكێشی ئامادەبووان كرد و داوای لە سەرجەم بەشداران كرد بە را و بۆچوونی خۆیان هاوكار بن لەوەی حیزبی دیموكرات بتوانێ باشتر و كاریگەرتر رووبەڕووی قۆناخە تازەكانی خەبات ببێتەوە.

لە میانەی سمیناردا، گرینگییەكی زۆر بە باری پەروەردە و راسانی تاراوگە درا كە دواتر بەشداران بۆچوونی خۆیان لەسەر باسەكان خستەڕوو و لە كەشێكی دیموكراتیكدا وەڵامی شیاوی خۆیان وەرگرتەوە.

هەر لە درێژەی سمیناردا، لەگەڵ ئەوەی سپاسی كۆمیتەی پێشووتری حیزب لە شاری ڤێسترۆس كرا، بەشدارانی كۆبوونەوە لەسەر ئەندام و پێكهاتەی تازەی كۆمیتەكەیان رێككەوتن و بڕیاری لەسەر درا.