كۆبوونەوەی کۆمیتەی هاوکاری هێزە سیاسییەکانی کوردستان بەبەشداریی بەرپرسی کۆمیتەی حیزب بەڕێوەچوو

رێکەوتی ١٨/٠٥/٢٠١٩ لە ستۆكهۆڵم کۆبوونەوەی کۆمیتەی هاوکاری هێزە سیاسییەکانی کوردستانی لە سوئێد بە بەشداری بەرپرسی کۆمیتەی گشتی حیزبی دێموکراتی کوردستانی ئێران لەو وڵاتە بەڕێوەچوو كە تایبەت بوو بە هەڵسەنگاندنی بارودۆخی ئێستای کوردستان و بەتایبەت باشووری کوردستان.

لە کۆبوونەوەكەدا کۆمیتەی هاوکاری نامەیەکی لە چەند خاڵدا ئاراستەی هەموو هێزە سیاسییەکانی کوردستانی کرد و تێیدا داوای یەکڕیزی و تەبایی زياترى نیوماڵی کوردی کرد و داوای لێكردوون بەرژەوەندیی نەتەوەیی لە سەرووی هەموو بەڕژەوەندییەکانی تری وەك حیزبی دابنێن. هەروەها سەبارەت بە لێک نێزیکبوونەوەی هێزە سیاسییەکانی کوردستان و هەوڵدانیان بۆ پێکهێنانی كابینەی نۆیەمی حکوومەتی هەرێمی کوردستان گفتوگۆ كرا و هیوای سەرگرتنی ئەو هەوڵانەیان خواست. 

هەروەها داوای پێكهاتنی خێرای حكوومەتی هەرێم، رێکخستنی دام و دەزگاکان وەک رێکخستنی هێزی پێشمەرگەی کوردستان، داڕشتنەوەی سیاسەتی وەزارەتی دارایی لەسەر بنەمای ئابووری و بازرگانیی ناودەوڵەتی كرا و باری خزمەتگوزایی گشتی هەموار بكرێتەوە و چاكسازییەكی گشتی هەموو كەرتەكان بگرێتەوە.

هەروەها کۆمیتەی هاوکاری، ناوەندی هاوکاری هێزە سیاسییەکانی رۆژهەڵاتی کوردستانی بەرز نرخاند و بڕیار درا نامەیەکی پیرۆزبایی و دەستخۆشیان بۆ بنێریت.

پێویست بە ئاماژەیە کە لە سەر داوای بەشدارانی کۆبوونەوەكه، بەرپرسی کۆمیتەی حیزبی باسێکی سەبارەت بە بارودۆخی ناوچەکە بە گشتی و ئێران و رۆژهەڵاتی کوردستان بە تایبەتی پێشکەش کرد.

لە بەشی کۆتایی کۆبوونەوەکەدا لە سەر رەوشی ئێران و رۆژهەڵاتی کوردستان کۆمەڵێک پرسیار ئاراستەی هەریەک لە بەرپرسی کۆمیتەی حدکا و نوێنەری کۆمەڵەی شۆڕشگێڕی زەحمەتکێشان کران کە لە لایەن بەرپرسی کۆمیتەی حدکا كاك مەولوود عەبدیلزادە و نوێنەری کۆمەڵە کاک زاگرۆس خۆسرەوی بە تێر و تەسەلی وڵامیان درایەوە.