پەیامی هەیئەتی ئیجرایی یەكیەتیی خوێندكارانی دێموكراتی كوردستانی ئێران بە بۆنەی دوازدەهەمین ساڵڕۆژی دامەزرانی ئەو یەکیەتییە

پەیامی هەیئەتی ئیجرایی یەكیەتیی خوێندكارانی دێموكراتی كوردستانی ئێران

بە بۆنەی ٢٣ی ڕێبەندان، دوازدەهەمین ساڵڕۆژی دامەزرانی یەكیەتییەكەمان.

خوێندكارانی مافخوازی كورد!
تێكۆشەران و ڕێبوارانی ڕێگای ئازادی!

خەبات و تێكۆشانی خوێندكاری لە ئێران و كوردستانی داگیركراوی ڕۆژهەڵاتدا ئەو ڕاستییە ئاشكرا دەكات كە زۆر جار بەهۆی زاڵبوونی دیكتاتۆری و قەدەغەبوونی چالاكیی یاسایی و ئازادانەی حیزبە سیاسییەكان، بەشێكی بەرچاو لە ئەرك و ڕۆڵی ڕێكخراوە سیاسی و مەدەنییە سەربەخۆكان لە بیاڤی‌ سیاسی و كۆمەڵایەتیدا لە ئەستۆی‌ بزووتنەوەی خوێندكاری و چالاكانی ئەم بوارە بووە.

بزووتنەوەی خوێندكاری لە وڵاتی ئێمە لە هەلومەرجێكدا سەری هەڵدا كە دیكتاتۆریی پەهلەوی بە قۆرخكردنی هەموو بیاڤەكانی تێكۆشانی سیاسی و داخستنی هەموو درگاكانی چالاكیی سیاسیی سەربەخۆ و سەركوتی بێبەزەییانەی جووڵانەوە شوناسخوازەكانی گەلانی ئێران، دەیهەویست بە ناوی مۆدیڕنیزەكردنی ئێرانەوە، ڕێگا بۆ پێكهێنانی كۆمەڵگایەكی یەكچەشن و یەكدەنگ خۆش بكات.

لەم نێوانەدا خوێندكارانی كورد و لە سەرووی هەموویانەوە ڕووناكبیری بلیمەت، شەهید دوكتور قاسملوو و دواتریش خوێندكارانی شۆڕشگێڕی وەك سمایل شەریفزادە وەك توێژی بژاردەی كۆمەڵگای نەریتیی كوردستان بۆ یەكەمجار بە گرێدانی هەوڵەكانی بزووتنەوەی خوێندكاری لە نێوخۆ و دەرەوەی وڵات لەگەڵ خەباتی ڕزگاریخوازانەی نەتەوەیی كورد، بوونە پێشەنگ و بناغەدانەری بزووتنەوەیەكی خوێندكاریی بەهێز و خاوەن شوناسی نەتەوایەتی و دێموكراتیك لە كوردستاندا كە دواتر لە هەر دوو ئاستی ئێران و كوردستاندا كاریگەرییەكی حاشاهەڵنەگری لەسەر ڕەوتی تێكۆشانی مافخوازانەی گەلانی ئێران هەبوو و ئێستاش جێگە پەنجەی لە گۆڕەپانی سیاسی و كۆمەڵایەتیدا بە ڕوونی دیارە.

هاتنە سەر كاری ڕێژیمی كۆنەپەرستی كۆماری ئیسلامی و بە تایبەتی داخستنی زانكۆكان و دەستپێكردنی پرۆژەی كاولكارانەی ناسراو بە شۆڕشی فەرهەنگی، زەبرێكی قورس بوو كە پاش سەركەوتنی شۆڕشی ڕێبەندان وە بەر جەستەی بزووتنەوەی خوێندكاری كەوت و بۆ ماوەی چەندین ساڵ بێدەنگی و خەفەقانی بە سەر زانكۆكاندا زاڵ كرد. پاش تەواوبوونی شەڕی 8ساڵە و دەستپێكردنی سەردەمی بەناو سازەندگی، بەرەنگاربوونەوە لەگەڵ لێشاوی بێكاران و سیاسەتی نوێی ڕێژیم لە بیاڤی خوێندنی باڵادا، بوو بە هۆی پەرەسەندنی ڕۆژلەدوای ڕۆژی زانكۆ جۆراوجۆرەكان لە سەرتاسەی ئێراندا كە ئەوەش لە خودی خۆیدا بەرهەمهێنەری حەشیمەتێكی زۆری خوێندكار بوو كە دروشمەكانی دەیەی شەستی ڕیژیم نەیدەتوانی وەڵامدری هەستی پرسیارگەری و ڕەخنەگریی ئەوان بێت. لەو نێوانەدا خوێندكارانی كوردیش لە كۆتاییەكانی دەیەی شەست و سەرەتای دەیەی حەفتا بەم لاوە بە كۆمەڵێك هەوڵی جیاجیای وەك دەركردنی نامیلكە و گۆڤارە خوێندكارییەكان، دامەزراندنی ئەنجومەنی ئەدەبی و بەڕێوەبردنی كۆڕ و كۆمەڵە ئەدەبی و فەرهەنگییەكان، ماوە بە ماوە كۆمەڵێك كۆبوونەوەی شوناسخوازانەی پچڕپچڕ بە بێ هەبوونی ڕێكخستنێكی تۆكمە و یاسایی لە نێو خۆیاندا پێك بهێنن.

هاوكات لەگەڵ ئەو هەوڵانەدا بەشێك لە خوێندكارانی كورد هەوڵیان دا لە نەبوونی ڕێكخستنێكی كوردیی ڕێگەپێدراودا، كەڵك لە لانیكەمی دەرفەتەكان بۆ خۆدەرخستن وەربگرن و تێكەڵ بە چالاكییەكانی ڕەوتی ڕوو لە گەشەی بزووتنەوەی خوێندكاریی ناوەندگەرا لە نێو زانكۆكاندا بوون.

لووتكەی هەڵسووڕان و قوربانیدانی ئەوان لەو سەردەمەدا بوو كە لە ڕاپەڕینی خوێندكاریی ١٨ی پووشپەڕی ١٣٧٨دا خوێندكاری كورد “عێزەت ئیبراهیم نژاد” لە هێرشی دڕندانەی هێزە سەركوتكەرەكانی ڕێژیمدا بۆ سەر خەوتنگەكانی زانكۆی تاران گیانی لە دەست دا و بوو بە یەكێك لە هێماكانی ئەو ڕاپەڕینە.

لەو ماوەیەدا خوێندكارانی كورد بەردەوام لە ڕێگەی كۆڕ و كۆبوونەوەی جۆراوجۆر و ئەنجومەنی ئەدەبی و گۆڤارەكانەوە هەوڵیان دەدا بۆشایی ڕێكخستنێكی تۆكمە و سەربەخۆی خوێندكاریی كوردی لە زانكۆكاندا پڕ بكەنەوە.

تەوەرەكانی چالاكیی ئەو بزاڤە هەر لە سەرەتای سەرهەڵدانیەوە پرسگەلێك وەكوو پرسی نەتەوەیی، بارودۆخی كوردستان و بە تایبەتی باشووری كوردستان، مافی ژنان، مافی مرۆڤ، دێموكراسی و … لە ئێران و كوردستاندا بووە كە لە زۆربەی ڕاگەیاندنەكانی خۆیاندا چ بە شێوەی پەیام و چ بە شێوەی‌ گوتار، باس، بابەت و لێكۆڵینەوەیان لە سەر هەبووە.

لەو ماوەیەدا كە هێزە سیاسییەكانی كوردستان چالاكیی ئاشكرایان لە وڵاتدا كەمتر بووە یان بۆ ماوەیەكی زەمەنی هەر نەبووە، خوێندكارانی كورد هەوڵیان دا كە لە چوارچێوەی بزووتنەوەیەكی خاوەن ناسنامە و دانپێدانراودا پرسی كورد بە شێوەیەكی بەرفراوان و زانستی بهێننە ئاراوە.

ئەو بزاڤە بۆ ئەوەی بتوانێ ببێتە بزووتنەوەیەكی خاوەن گوتاری شوناسخوازانە و دێموكراتێك و لە ئاڵوگۆڕەكانی نێو زانكۆ و كۆمەڵگادا بە تەواوی لە سەر پێی خۆی ڕاوەستێت و لە هێژمۆنی زاڵخوازانەی پارادایمی ناوەندگەرێتی بە تەواوی داببڕێت، لە هەوڵێكی بەردەوامدا بوو بۆ ئەوەی كە ببێتە خاوەن ڕێكخراوی تایبەت بە خۆی و هەڵگری شوناسیی نەتەوەیی خۆی، تاكوو خەباتەكەی بەردەوامتر و بەرنامەدارتر بكات و قوربانیدانەكانی نەچنە خانەی خزمەت بە گوتاری بزووتنەوەیەك كە لە پێوەندی لەگەڵ پرسی ماف و شوناسی نەتەوەیی ئەواندا جیاوازییەكی ئەوتۆی لەگەڵ ڕێژیمی كۆماری ئیسلامی نەبووە و نیە. بەڵام هەوڵەكانی چالاكانی خوێندكاریی كورد لە نێوخۆی وڵاتدا بۆ ئەم مەبەستە لەگەڵ بەربەستی یاسا كۆنەپرستانەكانی ڕێژیمدا بەرەوڕوو بوو، هەر بۆیە لە ٢٣ی ڕێبەندانی ١٣٨٣ی هەتاوی (٢٠٠٥ی زایینی) كۆمەڵێك لە چالاكانی خوێندكاریی كورد لە دەرەوەی وڵات و لە باشووری كوردستان، بۆ یەكەم جار ڕێكخراوی یەكیەتیی خوێندكارانی دێموكراتی كوردستانی ئێرانیان دامەزراند. یەكیەتیی خوێندكاران كە لەو ماوەیەدا هەتاكوو ئێستا پێنج كۆنگرەی خۆی بە شێوەیەكی دێموكراتیك و سەردەمیانە بەڕێوە بردووە، هەوڵی داوە بە دیاریكردنی كۆمەڵێك هێمای خوێندكاریی نەتەوەیی وەك دیاریكردنی ١٢ی بانەمەڕ (ساڵڕۆژی شەهیدبوونی هاوڕێ سمایل شەریفزادە لە ڕاپەڕینی چەكدارانەی ٤٦ـ٤٧دا) وەكوو ڕۆژی خوێندكاری كورد و هەڵگرتنی كۆمەڵێك هەنگاوی كردەكی، كار بۆ ڕێكخستنی خوێندكارانی كورد لە زانكۆكانی ئێران و دەرەوەی وڵات و كاناڵیزە كردنی هەوڵ و تواناكانیان لە ڕێڕەوی گوتارێكی نەتەوەیی هاوبەشدا بكات و پێش بە پەرتەوازەبوونی وزەی شۆڕشگێڕانە و بە فیڕۆچوونی هەوڵ و توانای خوێندكارانی كورد لە ئێران و ڕۆژهەڵاتی كوردستاندا بگرێت.

یەكێك لە خاڵە لاوازەكانی بزووتنەوەی خوێندكاری لە ئێراندا كە یەكیەتیی خوێندكاران هەوڵی داوە خوێندكارانی كورد لەو بوارەدا وشیار بكاتەوە، مەترسیی تێكەڵبوون بە كایەی سیاسیی تاقم و باڵەكانی دەسەڵات و بەتایبەتی چەواشەكارییەكانی باڵی ئیسڵاحخواز بۆ ڕەواییدان بە ڕێژیم و پاساودانەوەی سەركوتكارییەكانی بووە. لە ساڵانی ڕابردوودا بینیومانە كە خوێندكارانی سەر بە بزووتنەوەی ناوەندگەرا سەرەڕای چەندین جار شكستهێنان لە تاقیكردنەوەی بەڵێنییەكانی ئەو تاقمە چەواشەكارەی ڕێژیمدا بەردەوام هەڵەكانی خۆیان دووپات كردۆتەوە و بوونەتە قوربانی و زیانلێكەوتووی سیاسەتەكانی ئەو باڵەی ڕێژیم لە زانكۆدا و پۆتانسێلی خۆیان لەو پێناوەدا بە فیڕۆ داوە. لە سەركوتی دڕندانەی ڕاپەڕینی خوێندكاریی ١٨ی پووشپەڕەوە تا ئێستا چەندین جار باڵی ئیسڵاحخوازی ڕێژیم سەرەڕای ئومێدێكی زۆر كە خوێندكارانی ئێرانی لەسەر بەڵێنییەكانی ئەوانیان هەڵچنیبوو، لە بەردەم سەركوت و داپلِۆسینەكانی ڕێژیمدا پشتیان لە خوێندكاران و زانكۆ كردووە و بەو حاڵەشەوە هەموو جارێك و دواجاریش لە تەبلیغاتی هەڵبژاردنی ڕۆحانیدا بۆ سەرۆك كۆماری، بزووتنەوەی خوێندكاریی ناوەندگەرا سوودی لە ئەزموونەكانی ڕابردوو وەرنەگرتەوە و بەبێ هیچ گەرەنتییەك تێكەڵ بە شەپۆلی پۆپۆلیزمی ڕۆحانی و باڵی بەناومیانەڕو بووە و بوو بە دەزگای كۆكردنەوەی دەنگ بۆ ڕێژیم.

ئێستا كە لە كۆتاییەكانی خولی یەكەمی سەركۆماریی ڕۆحانی نزیك دەبینەوە، بە نیشتنەوەی تەپوتۆزی چەواشەكارییەكان و تەبلیغاتی سەردەمی هەڵبژاردنی ناوبراو، دروستیی هەڵوێستەكانی یەكیتییەكەمان زیاتر دەركەوتووە و بۆ هەموان زیاتر ئاشكرا دەبێت كە هۆتاڤكێشان بۆ سەركەوتنی ڕۆحانی و دڵخۆشكردن بە بەڵێنییەكانی ناوبراو بە تایبەتی لە پێوەندی لەگەڵ ئازادی و سەربەخۆیی زانكۆكان و مافەكانی خوێندكاران و هەروەها هێندێك مافی وەك خوێندن بە زمانی دایكیدا جگە لە خەساركردنی تواناكانی خوێندكاران هیچ دەسكەوتێكی بە دواوە نابێت و بەشێكی چارەنووسساز لەو هێز و وزە ڕادیكاڵەی كۆمەڵگاكەمان بۆ گۆڕانی بنەڕەتی و پێكهاتەشكێن بە لاڕێدا دەبات و بە پێچەوانەی تەبلییغاتی باڵی لە دەسەڵات كەوتووی ڕێژیم، توانەوە لەو سیاسەتەدا نەك هەر تێچووی خەباتی مافخوازانە كەمتر ناكاتەوە، بەڵكوو بە ڕەواییدان بە كایەی باڵەكانی دەسەڵاتی داگیركەر، ڕێگای گەیشتن بە ئازادی و مافەكان، درێژتر و ئاسۆی سەركەوتن تەمومژاوی دەكات.

یەكێتیی خوێندكارانی دێموكراتی كوردستانی ئێران بە هۆی بەرچاوڕوونییەك كە بەرانبەر بە دۆخی ئێستای وڵاتەكەمان و نێوەڕۆكی ڕاستەقینەی كۆماری ئیسلامی هەیەتی، چ لە هەڵبژاردنەكانی ڕابردوودا و چ لە هەڵبژاردنی داهاتووی سەركۆماریدا، هەڵبژاردن لە چوارچێوەی یاساكانی ئەو ڕێژیمەدا بە ناوێكی بێ ناوەڕۆك و چاوبەستن و خۆڵ لە چاوی خەڵك كردن دەزانێ و پێی وایە بەشداریكردنی ئەمجارەش هەمان ئاكامی جارەكانی پێشووی دەبێت و هیچ سوودێكی بۆ خەڵك و بە تایبەتی بە قازانجی خوێندكاران و لە ڕاستای كراوەیی لە فەزای زانكۆكانی ئێراندا نابێت.

لە یەك ساڵی ڕابردوودا لە كوردستانی داگیركراوی ڕۆژهەڵات، بزووتنەوەی نەتەوەیی دێموكراتیكی كوردستان بە ڕێبەرایەتیی حیزبی دێموكرات، شێوازێكی نوێی خەبات لە ژێر ناوی “ڕاسان” دژ بە دەسەڵاتی داگیركەری تاران وە ڕێ خست و هەروەك سەردەمی شۆِرشی چەكداریی ٤٦ـ ٤٧ كە وەبیرهێنەری خەباتی قارەمانانەی هاوڕێی خوێندكار سمایل شەریفزادە و خەباتگێڕانی دیكەی ئەو ڕاپەڕینە مەزنەیە، ئەمجارەش دوورگەی بە ڕواڵەت ئارامی دیكتاتۆریی هەژاند و توانیی لە چەندین بەرەنگاریی حەماسیدا زەبرێكی تەزێنەر لە پشتی داگیركەران بسرەوێنێت و گیانێكی شۆڕشگێڕانەی نوێ بە گەل و نیشتمانەكەمان بداتەوە. بە داخەوە لە ڕەوتی ئەو خەباتە پڕشانازییە و هەروەها لە بەرەكانی بەرگری و شەڕی ڕەوای نەتەوەكەمان دژ بە تیرۆر و كۆنەپەرستیی خەلافەتی ئیسلامیدا، خاكی كوردستان بە خوێنی ئاڵی چەندین ڕۆڵەی ئازادیخوازی گەلەكەمان ڕەنگین كرا كە لە ڕیزی ئەو پۆلە گیانبازانەی ڕێبازە پیرۆزەكەماندا ناوی شەهیدان سەلاح نادری ئندامی یەكیەتیی خوێندكارانی دێمۆكراتی كوردستانی ئێران و ڕسووڵ موحەممەدزادە، ئەندامی پێشووتری لێژنەی بەڕێوەبەریی یەكیەتیی خوێندكارانی دێمۆكراتی كوردستانی ئێران وەكوو دوو ئەستێرەی پرشنگدار بۆ هەتاهەتایە دەدرەوشێنەوە.

لە دوازدەهەمین ساڵیادی دامەزرانی یەكیەتیی خوێندكارانی دێموكراتی كوردستانی ئیراندا ڕێز لە خەبات و تێكۆشانی هەموو خوێندكارانی ئازادیخوازی كورد و گەلانی ستەملێكراوی دیكەی ئێران بۆ گەیشتن بە ئامانجە هاوبەشەكانمان دەگرین. سڵاو دەنێرین بۆ ئەو خوێندكارانەی كە لە نێو گرتووخانەكانی ڕێژیمی داگیركەری ئێراندا قارەمانانە دیفاع لە ماف و ئازادییەكانی گەلە ستەملێكراوكەمان دەكەن. یادی شەهیدانی سەربەرزی بزووتنەوەی خوێندكاریی كورد لە ئێران و هەموو شەهیدانی ڕێگای ئازادی و ڕزگاریی كوردستان بەرز ڕادەگرین و تا گەیشتن بە لووتكەی ئامانجەكانیان پەیمانیان لەگەڵ نوێ دەكەینەوە.

سڵاو بۆ شەهیدانی ڕێگای ئازادی

سەركەوتن بۆ خوێندكارانی مافخوازی كورد

بەرز و پیرۆز بێت دوازدەهەمین ساڵیادی دامەزرانی یەكیەتیی خوێندكارانی دێمۆكراتی كوردستانی ئێران

یەكیەتیی خوێندكارانی دێموكراتی كوردستانی ئێران
هەیئەتی ئیجرایی

٢٣ی ڕێبەندانی ١٣٩٥ی هەتاوی

 

تێبينيى
ئامادەکردن...