كەڕنەڤاڵی پشتیوانی لە ڕیفراندۆم بۆ سەربەخۆیی باشووری كوردستان بە شكۆیەكی گەورەوە بەڕێوەچوو

دوای نیوەڕۆی ڕۆژی شەممە ڕێكەوتی (١٦ی سێپتامبری ٢٠١٧ی زایینی) كەڕنەڤاڵی پشتیوانی لە ڕیفراندۆم بۆ سەربەخۆیی باشووری كوردستان لە نێو ئاپۆڕای كوردستانیانی هەر چوار پارچەی كوردستان كە نیشتەجێی وڵاتی سویدن و هاوكات بە شەكانەوەی ئاڵای پیرۆزی كوردستان بە شكۆیەكی گەورەوە لە شاری ستۆکهۆڵم، بەڕێوەچوو.

لە دەستپێكی پڕۆگرامی كەڕنەڤاڵەكەدا ساتێك بێدەنگی بۆ گیانی سەرجەم شەهیدانی كوردستان ڕاگیرا و دواتر سروودی نەتەوەیی ”ئەی ڕەقیب” پێشكەش كرا.

لە ناوەڕۆكی پڕۆگرامی كەڕنەڤاڵەكەدا پەیامی بەڕێز مەسعود بارزانی سەرۆكی هەرێمی كوردستان- ئێراق، ڕوولە بەشدارانی ئەو كەڕنەڤاڵە بە هەردوو زمانی كوردی و سویدی خوێندرایەوە.

دواتر پەیامی هەر یەك لە نوێنەرایەتی حكومەتی هەرێمی كوردستان لە وڵاتانی ئەكسەندەناویا، پەیامی فیدراسیۆنی كۆمەڵە كوردستانییەكان لە وڵاتی سوید، كۆمیتەی هاوكاری هێزە سیاسییە كورد و كوردستانییەكان لە وڵاتی سوید،پەیامی فرێدریك ماڵم پەرلەمانتاری پارتی گەلی سوید لە پەڕڵەمانی سوید،  و خاتوون لاوین  ئەندامانی پارلەمانی سوێد لە سەر لیستی سوسیال دێموکراتەکان پێشكەش كران.

سەرجەمی پەیامەكان داكۆكی كردن بوو لە مافی چارەی خۆنووسینی كورد و پشتیوانی كردن لە ڕیفراندۆم بۆ سەربەخۆبوونی كوردەكانی باشووری كوردستان و دامەزراندنی دەوڵەتی كوردی.

لەو كەڕنەڤاڵەدا چەندین هونەرمەندی گۆرانیبێژی ناسراوی كورد وێڕای پشتیوانییان لە سەربەخۆیی باشووری كوردستان گۆرانی و سروودی شۆڕشگێڕییان پێشكەش بە بەشدارانی ئەو كەڕنەڤاڵە كرد.

شایەنی باسە كە ڕێژەیەكی بەرچاو لە ئەندامانی حیزبەكەمان لە وڵاتی سوید (حیزبی دێموكڕاتی كوردستانی ئێران) لەسەر ڕاسپاردە و بانگەوازی حیزبەكەمان بۆ پشتیوانی لە سەربەخۆیی باشووری كوردستان، بەشداریان لەوكەڕنەڤاڵەدا كردبوو. ئەندامانی حیزبەكەمان جگە لە شاری ستۆكهۆڵم لە شارەكانی دیكەشەوە وەك: ڤێسترۆس،ئیسكلستوونا، ئۆرەبروو، یۆتۆبۆری، كاڵمار، سالە، كاڕلستاد، لینشۆپینگ و فاڵۆنەوە هاتبوون وبەشداریان لە ئەو  ئەوكەڕنەڤاڵە پشتیوانی لە ڕیفراندووم بۆلسەربەخۆیی باشووری كوردستان کرد.

 

تێبينيى
ئامادەکردن...